Spread the love

好多人穿完環一段時間會出現傷口痕癢，有人會誤會傷口發炎所以痕癢，但原來傷口埋口痕係有原因架！😊

無論用咩方法穿環都好，都係做一個傷口出黎。而呢一個傷口係會相比我地平時擦傷深好多，因為我地係穿過整個組織，所以一定會影響到入面嘅表皮層，真皮層。而主要導致痕癢嘅原因為組織胺，喺我地傷口埋口嘅過程會分泌組織胺，當組織胺釋出時，會使血管擴張、血流增加、皮膚產生紅、腫、熱、痛、癢等現象。

而當受更多外來刺激，如碰撞，又或接觸過敏源，會更刺激傷口內壁，刺激血管，更甚者還使血管壁的通透性增大，使血液中一些成分漏出，也使血液中的白血球更容易溢出。成為炎性反應- 表現是局部的紅、腫、熱、痛現象。

由於埋口過程增加了血液，膠原蛋白及組織胺，於傷口上的活動增加壓力，會刺激附近的神經線， 造成紅腫，麻痺和痕癢甚至脹痛。

我地穿環係製造一個長期傷口，由於穿環會植入人體以外的物料，就算係金，銀，醫療鋼，鈦金屬等高防敏感耳環，但始終不是人體本身原有物質，身體接受都要一段時間，一般穿環大概9個月康復期，皮膚內壁才開始成型，喺呢段期間，我地換耳環做成摩擦，或有任何致敏原（染髮，香水…….）都有機會影響埋口，使痕癢感覺持續。