好多人一講起紋身，第一時間就會問痛唔痛，有幾痛？但當你親身體驗過之後，你就會發現，痛，只係一個好短嘅過程，幾個鐘就會過去。但係，紋身康復期間嘅痕癢，可以令你癢夠幾日，甚至幾個星期，仲要忍住手唔可以拗，先係真正嘅「打大佬」。到底點解紋身康復過程中會痕呢？

點解康復時會咁痕？

簡單嚟講，皮膚係身體上最大嘅器官，用嚟保護我哋嘅身體免受細菌入侵。當我哋有傷口，身體就當然會作出反應去修復。紋身過程中會破壞皮膚細胞，而傷口嘅出現，會令到細菌容易入侵。傷口復原會痕癢就係因為身體正在修復組織同埋防禦細菌。組織損傷後會分泌組織胺，亦即係導致痕癢嘅主要源頭。當組織胺釋出時，會刺激血管擴張、血流增加；產生傷口局部嘅紅、腫、熱、痛等現象。
喺傷口須要癒合期間，表皮細胞會由傷口四周，由外逐漸向中間生長，喺生長過程當中，容易刺激到負責傳送痛覺、溫覺與搔癢感嘅神經纖維，亦會產生痕癢感覺。

到底會痕幾耐？

身體的纖維細胞大量製造膠原修復皮膚，正常傷口會在一至兩星期內癒合，經過結痂及表皮再生過程後，大約十日即會長出新皮，期間皮膚傷口附近會紅腫、麻痺同痕癢。痕癢感覺唔一定只係喺康復結痂時出現，表皮再生嘅過程，亦有機會出現痕癢感。當然康復時間因人而異，視乎體質、年齡、傷口護理、紋身所需技巧對皮膚所造成嘅傷害，種種因素都會影響康復時間。皮膚嘅生長週期為28日， 而通常一個紋身康復，表皮再生嘅過程，基本需要一至兩個週期嘅時間，即係28至56日左右。

可以點樣止痕？

記得！記得！記得！幾痕都好，千其唔可以多手去拗呀！除咗會影響紋身效果之外，仲會有機會造成細菌感染。
傷口最理想嘅康復狀態，應該保持傷口輕微濕潤度，唔好俾傷口太過乾。
曬得多、天氣太熱出汗均會影響傷口癒合，亦有機會加劇傷口痕癢，令人忍唔住去拗。
如果真係好痕可以點做？
  • 建議使用紋身專用藥膏（唔好用凡士林呀），紋身藥膏當中成份幫助皮膚修復，同時為傷口提供滋潤保濕。需跟從紋身師指引，唔好亂咁搽呀。（將會有另一篇文章詳細講解）
  • 戒口，避免進食刺激性食物（將會有另一篇文章詳細講解）如果體質容易敏感，就記得一定要戒口。
  • 輕力向傷口吹涼風，可以做到短暫嘅舒緩作用
  • 喺傷口表面輕力拍打，可以做到短暫嘅舒緩作用。並不是最建議做法，因為會對傷口造成刺激。不過如果真係要拍打，要記得手必需要清潔乾淨，同埋係輕力，真係只可以好輕好輕力，唔可以令到影響到結痂同表皮！
  • 做啲唔關紋身事嘅無謂嘢，去分散下注意力😅。

有人教我咁樣做嚟止痕，又啱唔啱？

有客人曾經話，見過網路上有人教，用酒精搽喺傷口外圍，可以幫助止痕。❌絕對係錯㗎！千其唔好咁做呀，酒精對傷口太刺激喇，只會令你容易出現過敏同埋令到皮膚過乾。另外，亦會有人選擇不斷用清水沖洗，以舒緩痕癢感，但請注意，不能沖太長時間，以免被水長時間浸泡傷口以令細菌入侵，同時記得要用紙巾將所有水份印乾，唔可以用毛巾。同埋亦有人教隔住毛巾冰敷或用濕毛巾敷，濕毛巾將會直接接觸傷口，當然你需要確保所使用嘅布係乾淨衛生無細菌之餘，亦要留意毛巾嘅表面都會有機會影響結痂。